د «انسان» څېړنیز بنسټ رهبرۍ د روان هجري شمسي کال د تلې په ۱۵مه د لوړو زده‌کړو وزارت له مالي او اداري مرستیال ښاغلي نوراحمد درویش، د پلان او پالیسۍ له رییس بری مبارز، د اطلاعاتو او نشراتو رییس حامد عبیدي او د لوړو زده‌کړو د پراختیا پروګرام د ستراتېژۍ له متخصص خالد مومند سره د هغه په دفتر کې وکتل.

په دې کتنه کې د «انسان» عمومي رییس ښاغلي فهیم کریم لومړۍ د «انسان» د پيل او اوس په اړه خبرې وکړې او په افغانستان کې یې د سیاسي، اقتصادي، فرهنګي او ټولنیزو تحولاتو اغېز د څېړنې او پالیسۍ پر فرهنګ باندې خبرې وکړې. هغه زیاته کړه، د افغانستان دولتي پوهنتونونه لا هم د پنځوسو کالو پخواني اکاډمیک عرف پر اساس چې یو رښتیز یا Mono-Disciplinary دی اکاډیمیک تشکیلات او جوړښتونه لري. هغه همدا راز د هېواد په پوهنتونونو کې د څو رښتیز او منځ‌رښتیز مطالعاتو او تحصیلي څانګو د ایجاد پر اهمیت او په یو شمېر برخو کې د «انسان» پر ونډې او مفکورو خبرې وکړې او د مهاجرت د مطالعاتو، فرهنګي مطالعاتو او د جګړې د مطالعاتو د څو رښتیزو ډيسپلینونو د ایجاد وړاندیز او په دې برخه کې یې د ګډې همکارۍ باندې تمرکز وکړ. ورپسې د «انسان» څېړنیزې موسسې د څېړنو مرستیال ښاغلي ضیاالحق شمس د دې بنسټ په فعالیتونو، پروګرامونو، او په هیواد کې د څېړنو د ملي پالیسۍ پر شتون او د څېړنو د کلتور په عامولو کې د ملي ادارو د مرستو او همکاریو په اړه هر اړخیزې خبرې وکړې. ښاغلي شمس د خپلو خبرو په جریان کې د «انسان» له لوري د افغانستان د څېړنې شبکې پر نوښت اختصاصي تمرکز وکړ او د هغه په چوکاټ کې یې په افغانستان کې دننه او بهر د افغان څېړونکو او متخصصینو د حضور، د څېړنیزو مرکزونو د غړیتوب او ورته سهولتونو په باب مالومات ورکړل او هغه یې د یو پیاوړي او ټول‌شموله څېړنیز نظام په رامنځته کولو کې یو بنسټیز ګام یاد کړ. ښاغلي ایمل جلال د «انسان» څېړنیزې موسسې د کلتوري مطالعاتو د پروګرام مشر، د فرهنګي مطالعاتو پر اهمیت او څرنګوالي او په ځانګړي ډول د «انسان» له لوري د فقر د مطالعاتو پر پروژې هر اړخیزې خبرې وکړې. ښاغلي جلال همدا راز د «انسان» له لوري د افغانستان د څېړنې او پراختیا د کنفرانس پر طرحې چې په نژدې راتلونکي کې د «انسان» لخوا د نورو هم‌لورو دولتي او غیر دولتي بنسټونو کې باید دایر شي او په دې کې د لوړو زده‌کړو د وزارت او په لویه کې د لوړو زده‌کړو د سیستم د همکارۍ غوښتنه وکړه. ښاغلي جلال همداراز له کابل پوهنتون سره له نژدې د کار او د ملاتړ پر ضرورت او په دې برخه کې د «انسان» پر طرحې رڼا واچوله چې څنګه باید د څېړنو، مطالعاتو، بحثونو او اړوند چارو په برخه کې له نژدې کار وشي.  

د لوړو زده‌کړو مالي او اداري مرستیال ښاغلي نوراحمد دروېش د «انسان» څېړنیزې موسسې د فعالیتونو ستاینه وکړه او زیاته یې کړه، د لوړو زده‌کړو وزات له «انسان» سره د علمي- تحقیقي فعالیتونو او د څېړنو او پراختیا کنفرانس په دایرولو کې هر ډول مرستې ته چمتو دی.

ښاغلي درویش څېړنه او پراختیا له یو بل سره تړلي وبلل او ویې ویل :«د لوړو زده‌کړو وزارت د استادانو د ظرفیت لوړونې  له پاره د څېړنو د مرستې (Research Grants) او د دوکتورا سکالرشیپونه په نظر کې نیولي څو وکولای شو معیاري څېړنې ترسره او ستونزو ته د حل‌لاره پیدا کړو».

نوموړي د «انسان» څېړنیز بنسټ له لوري د علمي او څېړنیزو پروګرامونو د وړاندیز هرکلی وکړ، او پدې اړه یې په را تلونکي کې د لیدنو سپارښتنه وکړه. په ورته وخت کې د لوړو زده‌کړو لپاره د لس کلن ستراتېژیک پلان د تدوین او د څېړنیزو او علمي برخو پر پالیسیو د بیاکتنې په اړه یې د «انسان» د حضور او سهم غوښتنه وکړه چې «انسان» څېړنیزې موسسې له لوري یې هرکلی وشو.

د غونډې په پای کې «انسان» په اړه د بشپړې پېژندنې سند، له لوړو زده‌کړو وزارت سره د ګډ کار او همکارۍ د چارچوب یادښت، او د افغانستان د څېړنې او پراختیا کنفرانس طرحه شریکه او د نورو ملاتړو اسنادو د شریکولو ژمنه وشوه. ټاکل شوې ده چې د لوړو زده‌کړو وزارت او د «انسان» څېړنیزې موسسې ترمنځ د علمي او څېړنیزو بحثونو او خبرو اترو لړۍ په راتلونکي کې هم دوام پیدا کړي.