د انسان  څېړنیزې موسسې مشرتابه د مخابراتي خدمتونو د تنظیم ادارې له سره د هېواد د تاریخي، تحقیقي او علمي متونو د ډیجیټالي کولو په تړاو ناسته وکړه. په دې کتنه کې د انسان انسټیټوت رییس فهیم کریم، د بورډ غړي ایمل جلال، او د انسټیټوت څېړونکي او د څېړنیزې پراختیا مسوول محمد باسط واحدي د انسان انسټیټوت په استازیتوب برخه اخیستې وه.

په دې کتنه کې چې د اترا په دفتر کې ترسره شوه د اترا د رییس ښاغلي عمر منصور انصاري په ګډون د یادې د مشرتابه نورو غړیو هم حضور درلود. د انسان انسټیټوت رییس ښاغلي فهیم کریم په خپلو خبرو کې د «انسان» او نورو نورو ادارو او بنسټونو ترمنځ د څېړنو، پراختیا او علمي غنامندۍ پر ارزښت خبرې وکړې او د یادو بنسټونو په مرسته یې د افغان پوهانو د څېړنیزو مقالو د ډیجټالي کولو لپاره چمتو کول او خپرول یاد کړل،  څو له دې لارې د تاریخي منابعو په خوندي کولو د علمي تحقیقاتو د پلیجریزم ستونزه راکمه او د افغان پوهانو څېړنې راتلونکو نسلونو لپاره د ډیجیټالي نړۍ برخه وګرځوي. ښاغلي کریم همدا راز د څېړنې او پراختیا د ملي کنفرانس یادونه وکړه چې تمه ده د یادې ادارې او نورو خپلواکو او دولتي بنسټونو ترمنځ د ملي ستراتېژیکو برنامه د تدوین او پالیسي جوړونه باندې تمرکز وکړي.

د اترا رییس ښاغلي انصاري په خپلو کې وویل، اداره یې د ډیجیټلي صنایعو او محتویاتو په تقویه کولو غواړي چې د هېوادوالو لپاره مرتبط آنلاین عملي، اقتصادي، معلوماتي او نوره منځپانګه زیاته او په دې ډول یې له انټرنټ سره د وصلېدو تقاضا زیاته شي: « دا به په خپل وار غوره پانګونې او خدماتو ته لار پرانیزي.»

د انصاري په خبره اترا اداره به د ټیلي میډیسن، انلاین زده‌کړو، ډیجیټل میډیا، الکترونیکي هويت او ټکنالوژۍ نړۍ کې په اختراعاتو او څېړنو پانګونه وکړي. د مجلس په پای کې هوکړه وشوه چې د «انسان» او «اترا» ترمنځ به د ګډو کارونو په موخه په یو میکانیزم کار کېږي او د نویو پرمختګونو لپاره به زمینه مساعدیږي.