انسان  انسټیټوت او د افغانستان د اطلاعاتو او فرهنګ وزارت ترمنځ د علمي، فرهنګي، رسنیزو او ټولنیزو چارو په برخه کې د همکاریو، ګډو موخو، او مشترکو پروګرامونو د اجراء په موخه د همکاریو یو هر اړخیز تړون لاسلیک شو.

د دې تفاهم‌لیک د محتوا له مخې به دواړه ادارې د څېړنیزو مسایلو د پراختیا، پرمختګ، ظرفیت‌لوړوني، او د اړتیا وړ ټولنیزو، فرهنګي او تاریخي مطالعاتو د اجراء لپاره  د څېړنیزې او مطالعاتي اجنډاء په برخه کې اقدامات کوي. دا تړون به دواړو لوریو ته دا فرصت ورکړي څو په افغانستان کې د څېړنیز کلتور د بډاینې او تدوین په برخه کې هم مشترکې او هر اړخیزې هڅې وکړي.

دا تړون چې د انسان څېړنیزې موسسې رییس ښاغلي فهیم کریم او د اطلاعاتو او فرهنګ وزارت د فرهنګ او هنر معین ښاغلي هارون حکیمي له لوري لاسلیک شو، د دواړو ادارو پر لا زیاتې خپل‌منځي همکارۍ ټینګار وشو.

د تفاهم‌لیک د امضاء په مراسمو کې، د اطلاعاتو او فرهنګ وزارت د فرهنګ او هنر معین هارون حکیمي ډاډ ورکړ، چې وزارت به له یاد انسټیټیوټ سره د هوکړه لیک په چوکاټ کې هر ډول مرسته کوي. دغه راز  ښاغلي حکیمي وویل، چې د انسان انسټیټیوټ څېړنې به د وزارت په ویبپاڼو خپرې کړي.

همدا راز د انسان انسټیټوت رییس فهیم کریم په خپلو خبرو کې د تاریخ اونۍ د دایرېدو په برخه کې چې د «انسان» کلنی نوښت دی، د اطلاعاتو او فرهنګ وزارت د مشرتابه او کارکوونکو د مرستو او همکارۍ مننه وکړه او ډاډ یې څرګند کړ چې یاد کلنی پروګرام به د یاد تفاهم‌لیک له مخې په راتلونکي کې هم د یاد وزارت د مرستې او همکارۍ لپاره مراجعه کوي.

دواړو لوریو هیله وښوده چې په افغانستان کې د کلتوري بډاینې، زغم، یو بل منلو او د انتقادي تفکر د رواج لپاره به له هر ممکن فرصت څه ګټه اخلي او د دې خاورې د انسانانو د هوساینې او بساینې لپاره به خپلې هلې ځلې جاري ساتي.