د انسان څېړنیز او رسنیز بنسټ د څېړنو څانګه د یو شمېر څېړنیزو نوښتونو او پروګرامونو مجموعه ده چې کاري او څېړنیز فرهنګ یې د افغان ټولنې له ژورو او پېچلیو ستونزو څخه سرچینه اخلي. څېړنیز کار او د پوهې خپراوی د «انسان» یو مهم استقامت دی. د یادې څانګې اصلي زمینه د «انسان څېړنیزه موسسه» ده چې د ۲۰۲۰ په اکتوبر کې په کابل کې تاسیس شوه او اوسنۍ بڼه یې د کاناډا په ټورنټو کې د یاد بنسټ له تاسیس وروسته رغېدلې ده.

زموږ په باور افغانان تر بل هر وخت زیات، د خپلو ستونزو او ورپېښو ګواښونو په تړاو نويو فکرونو ته اړتیا لري څو له نوې او بدلېدونکی نړۍ سره په وقار او انساني عزم سنبال په مخ ولاړ شي. څېړنیز نوښتونه، پروګرامونه، خپرونې، غونډې، سرچینې او روزنه د یاد څېړنیز استقامت مهمې برخې دي چې د خلاق تفکر او متکثر سهم په مټ به ترلاسه کېږي.

د یوې څېړنیزې موسسې په توګه، په افغانستان او پښتونخوا کې د باثباته انکشاف او هوساینې لپاره د یوې داسې لارنقشې د څېړلو او مالومالو لپاره فعالیت کول چې جګړه او تاوتریخوالی، دولتونه، انساني آزادي، او لوی بشري لیدلوری یې مطالعاتي اجزاووې وي. د موجودو او اوسنیو روایتونو او نظریو څېړنه او ارزونه، د پالیسیانو بیاکتنه، د بدلون لپاره په علمي څېړنو متکي وړاندیزونه، او نورې ټولې هغه هڅې چې انساني پوهه بډایه کړي او عقلاني فکر وهڅوي، زموږ ټولیزې موخې جوړوي.

د «انسان» څېړنیز لیدلوری په افغان خاوره کې د شته ګواښونو او ټولنیزو خوځښتونو په وړاندې، چې د ژور او چټک فرهنګي او سیاسي اوښتون سبب ګرځېدلی شي، د څورښتیز او ستراتیژیک چلند غوره کول اړین بولي.

بشري نیکمرغي د یو بنسټیز ارزښت په توګه د «انسان» لوړ ماموریت دی. موږ د څو موخیزو پروګرامونو له لارې غواړو دولتونه، مدني او سیاسي ټولنې، خپلواک متخصصین او څېړونکي، او اجرايي مسوولین په یو داسې ګفتمان کې سره مخ کړو چې موخه یې آګاهي، پوهه خپرول، او د خلکو اساسي ګټې وي.

د اوسنيو پروګرامونو او نوښتونو په اړه دلته هم لوستلی شئ

د تاریخ اونۍ
د جګړې د مطالعاتو پروګرام
افغانستان د څېړنې شبکه

د «انسان» څېړنیز موډل یو درې‌ضلعي بنسټ ولاړ دی؛ د اصلي څېړنو خپرول او ترسره کول، د څېړنیزو او رسنیزو سرچینو احیاء او انکشاف، او د افغانستان لپاره د څېړنیزو زېربیناوو ایجاد او د ظرفیتونو روزنه.

زموږ میتودولوژي دلته ولولئ

انساني ارزښتونو ته ژمنتیا: موږ په دې باور لرو چې انسان تر هر څه مهم دی او ښه انساني ژوند زموږ د څېړنو، ښوونیزو پروګرامونو او پالیسي جوړونې اصلي تمرکز دی.

خپلواکي: کاري او سازماني خپلواکي زموږ یو اصلي ارزښت دی. ټول غړي او همکاران په خپلو کارونو او فعالیتونو کې دا ارزښت په پام کې نیسي.

لوړ کیفیت، شفافیت : موږ په خپلو څېړنو، پالیسي تحلیلونو او عامه چارو کې د غوره عمل، مبتکرانه روش او متواتر پرمختګ له لارې کیفیت تضمینوو.

روښانفکرانه کثرت‌ګرايي: زموږ همکاران په دې باور لري چې هېڅ فکر باید د بل انسان ژوند، شخصیت، عزت، انساني حرمت زیانمن نه کړي. «انسان» په دې باورمند دی چې مختلف فکرونه او د متفاوتو لیدلوریو موجودیت کولای شي انساني پوهه بډایه کړي.

ګډکار: موږ په متواتر ډول په دې کار کوو څو د سازمان دننه ښه کاري چاپیریال او غوره ارتباطات رامنځته کړو. موږ په دې باور لرو چې په ملاتړي چاپیریال کې د ګډ کار کولو له لارې کولای شو ډېر څه تولید کړو او اغېزناک و اوسو.

انتقادي تفکر: موږ خپل همکاران او څېړونکي هڅوو څو په شته وضعیت انتقادي دید ولري او هغه قبول شوي نورمونه او جوړښتونه وننګوي چې زموږ ټولنه یې له هره اړخه له رکود سره مخ کړې.

ثبات او پر ځان تکیه: موږ له خپلو سرچینو څخه د اوږدې مودې لپاره د ګټې اخیستنې د سنجېدلي سیاست پلوي یو.

رضاکاري «انسان» د خپلو همکارانو او نورو افرادو وړیا، ټولنیز او عامه کار او سهم ته ارزښت ورکوي او د هغه چا په لټه کې دي چې غواړي په څېړنیزو او بشري کارونو کې له خپلې ټولنې سره مرسته وکړي.