د تاریخ اونۍ ۲۰۲۱ په اختتامیه مراسمو کې افغان ولسمشر محمد اشرف غني برخه واخیسته. دا پروګرام کلنی چې د جنوري په ۴مه پيل شوی و، د پای مجلس یې په چهارشنبه د جنوري په ۱۳مه د ارګ په چهارچار ماڼۍ کې ترسره شو.

په مراسمو کې چې د افغانستان ولسمشر محمد اشرف غني، لومړۍ مېرمن رولا غني، د چارو ادارې لوی رییس فضل‌محمود فضلي، د ولسمشر د دفتر رییس شاکر کارګر، د اطلاعاتو او فرهنګ وزارت سرپرست محمد طاهر زهیر، د یاد وزارت نشراتي معین عبدالمنان شیواي شرق، مالي، اداري او ګرځندوی معینه سیده مژګان مصطفوي، د لوړو زده‌کړو وزیر ډاکتر عباس بصیر، د پوهنې وزارت د کیفیت د تضمین معین داکتر سردار محمد رحیمي، د حج او اوقافو وزارت مسلکي معین داکتر امین‌الدین مظفري، د کابل پوهنتون رییس، د ښوونې او روزنې پوهنتون رییس او استادانو او د ننګرهار پوهنتون استادانو، د ولسمشر فرهنګي مشاورینو او خپلواکو څېړونکو او استادانو برخه اخیستې وه.

په ورته وخت کې په آنلاین ډول د تاریخ اونۍ په لړ کې په بحثونو کې شاملو څېړونکو، پوهانو او متخصصینو هم برخه لرله. په غونډه کې د ښاغلي ولسمشر محمد اشرف غني د اوږدو او هر اړخیزو خبرو برسېره، د چارو د ادارې لوی رییس، د اطلاعاتو او فرهنګ وزیر، د انسان څېړنیزې موسسې رییس، او د افغانستان د مطالعاتو امریکايي انسټیټوټ د کابل د څانګې رییس خبرې وکړې.

د تاریخ اونۍ دا کلنۍ پروګرام چې دویم پړاو یې په ۲۰۲۱ کې ترسره شو، د «انسان» له لوري دایر شو چې د اوو حضوري او انلاین بحثونو په ګډون د تاریخ له درېیو سیمو (د کابل ملي موزیم، ملي ارشیف او د امیر عبدالرحمان خان له مقبرې) څخه لیدنه وشوه چې په کې ګډونوالو ته د یادو برخو د متخصصینو له لوري مالومات وړاندې شول.

د تاریخ اونۍ ۲۰۲۱ کلنی پروګرام چې په کې لسګونو کسانو حضوري او سلګونو په کې په انلاین توګه برخه اخیستې وه، د نړیوالو پوهنتونونو متعددو متخصصینو او پوهانو په کې ویناوې وکړې چې انسان انسټیټوت په خپل وار د ټولو د حضور مننه او درناوی کوي.

په ورته حال کې انسان انسټیټوت د خپلو همکارو بنسټونو چې د تاریخ اونۍ په دې کلني پروګرام کې یې مرسته وکړه هم منندوی دی او په خپل وار د کاکړ تاریخ بنسټ او په ځانګړي ډول آغلې خوږې کاکړ، د افغانستان مطالعاتو امریکايي انسټیټوت او په ځانګړي ډول د کابل د څانګې رییس ډاکتر عمر شریفي او د بورډ له غړې ډاکتر دیپالي، د اطلاعاتو او فرهنګ وزارت له همکارانو او مشرتابه او ښاغلي سرپرست وزیر محمد طاهر زهیر، او د ملي موزیم، ملي آرشیف او د افغان‌ټور دولتي شرکت له مشرتابه په ځانګړي ډول ښاغلي ایمل جلال درناوی کوي او منندوی یې دي چې د فرصتونو، همکاریو او مرستو له لارې د دې تاریخي نوښت د ترسره کېدو امکان برابر کړ.

په ولسمشرۍ ماڼۍ کې د چارو ادارې له درنو همکارانو او مشرتابه او د ولسمشر د تشریفاتو له څانګې هم ځانګړې مننه چې په پای غونډه کې یې د ښاغلي ولسمشر حضور یقیني کړ، د افغانستان په روښانفکرانه او فرهنګي تاریخ کې به دا چاره تل لیک وي.

همدا  راز په انسان انسټیټوت او اړوند برخو کې د خپلو همکارانو د بې‌دریغه او بې‌کچې مرستو هم مننه کوو چې د دوی له همکارۍ او صبر پرته دا ستر پروګرام اجراء کېدل ستونزمن او حتی ناشوني برېښېدل.

په ورته مهال، هوډ څرګندوو چې د تاریخ د مطالعاتو، بیامطالعې او د بدلون لپاره د زمینې د ایجاد دا نوښت به هر کال ترسره کېږي او هڅه به کوو څو د ډېرو پوهانو، نویو افکارو، تازه تحقیقاتو او جدي موضوعاتو په وړاندې کولو او طرحه کولو سره د به تاریخ یو نوی پړاو او د مطالعاتو نوی بهیر پیل شي.

نېکمرغه دې وي د فکر او فرهنګ پالونکي

په درناوي

د انسان څېړنیزې موسسې مشرتابه

کابل – افغانستان